A Plataforma pola Defensa da Ría de Vigo, ‘Cíes’, enviou ao Concello de Vigo mediante rexistro municipal un escrito no que se denuncia que continúan os verquidos contaminantes á ría procedentes da rede de saneamento a pesar de estar xa a funcionar a nova depuradora do Lagares.
Tras un investimento millonario, a plataforma recalca que segue sen facerse unha depuración correcta das augas residuais, xa que non existen redes separativas de augas pluviais e fecais previas, así que nos días de choiva é tal a cantidade de auga que os puntos de impulsión non teñen capacidade para enviar todo á EDAR, polo que se abren comportas e se envía directamente á ría por diferentes aliviadoiros.
Dende a Plataforma ínstase ás autoridades a tomar medidas urxentes para establecer un maior control non só sobre os verquidos, senón tamén sobre os investimentos e o cumprimento da legalidade.
Esta mesma demanda trasladouse á Comisión de Peticións do Parlameto Europeo: Carta á Comisión de Peticións.
